இந்திய பணக்காரர்கள் பட்டியலில் தற்போது முதலிடத்தில் முகேஷ் அம்பானி

உலக பணக்காரர்கள் பட்டியலில் உருக்கு அதிபர் லட்சுமி மிட்டலை பின்னுக்குத் தள்ளி முன்னேறினார் ரிலையன்ஸ் அதிபர் முகேஷ் அம்பானி.இந்திய பணக்காரர்கள் பட்டியலில் தற்போது முதலிடத்தில் முகேஷ் அம்பானி உள்ளார்.வெளிநாடு வாழ் இந்தியரும் உருக்கு அதிபருமான லட்சுமி மிட்டல் அடுத்த இடத்துக்குத் தள்ளப்பட்டார்.

அமெரிக்காவிலிருந்து வெளியாகும் ஃபோர்ப்ஸ் பட்டியலில் இது தெரிய வந்துள்ளது.

1,950-கோடி டாலர் சொத்து மதிப்புடன் உலக அளவில் ஏழாவது பணக்காரராக முகேஷ் அம்பானி உள்ளார்.இவருக்கு அடுத்தபடியாக எட்டாவது இடத்தில் 1,930-கோடி டாலர் சொத்து மதிப்புடன் லட்சுமி மிட்டல் உள்ளார்.

2008-ம் ஆண்டு ஃபோர்ப்ஸ் வெளியிட்ட பட்டியலில் லட்சுமி மிட்டல் 2,500-கோடி டாலர் சொத்து மதிப்புடன் நான்காம் இடத்தில் இருந்தார்.

தொடர்ந்து 4,000-கோடி டாலர் சொத்து மதிப்புடன் மைக்ரோசாப்ட் அதிபர் பில் கேட்ஸ் முதலிடத்தைத் தக்க வைத்துக் கொண்டுள்ளார்.

கடந்த ஆண்டு முகேஷ் அம்பானியின் சொத்து மதிப்பு 2,300-கோடி டாலராக இருந்தது.

அனில் அம்பானி 1000-கோடி டாலர் சொத்து மதிப்புடன் 34-வது இடத்தில் உள்ளார்.கடந்த ஆண்டு 3,200-கோடி டாலர் சொத்து மதிப்புடன் அனில் அம்பானி ஆறாமிடத்தில் இருந்தது குறிப்பிடத்தக்கது.

கடந்த ஆண்டு பட்டியலில் 10-வது இடத்தைப் பிடித்த ரியல் எஸ்டேட் அதிபர் கே.பி.சிங்,தற்போது 98-வது இடத்துக்குத் தள்ளப்பட்டுள்ளார்.இவரது சொத்து மதிப்பு 500-கோடி டாலராக சரிந்துள்ளது.கடந்த ஆண்டு இவரது சொத்து மதிப்பு 2,500-கோடி டாலராக இருந்தது.

இந்திய கோடீஸ்வரர்களின் ஒட்டுமொத்த சொத்து மதிப்பு 18,000-கோடி டாலரிலிருந்து தற்போது 10,900-கோடி டாலராக சரிந்துள்ளது.

கடந்த ஆண்டு கோடீஸ்வரர்கள் பட்டியலில் 53-இந்தியர்கள் இடம்பெற்றிருந்தனர்.இது தற்போது 10-ஆகக் குறைந்துள்ளது.முதல் பத்து பேரில் 2-பேர் மட்டுமே இடம்பெற்றுள்ளனர்.

தொழிலதிபர் விஜய் மல்லையா,காற்றாலை அதிபர் துளசி தாந்தி,முகேஷ் அம்பானியின் நெருங்கிய தோழர் ஆனந்த் ஜெயின் ஆகியோர் பட்டியலில் இடம்பெறவில்லை.

இவர்கள் தவிர,ஜெட் ஏர்வேஸ் அதிபர் நரேஷ் கோயல்,யுனிடெக் அதிபர் எஸ்.ரமேஷ் சந்திரா,இந்தியாபுல்ஸ் அதிபர் சமீர் கெலோட்,எம்சிஎக்ஸ் அதிபர் ஜிக்னேஷ் ஷா,முதலீட்டு சந்தை வர்த்தகர் நிமேஷ் கம்பானி,கெளதம் தாப்பர்,கிராசியஸ் சல்தானா ஆகியோர் பட்டியலில் விடுபட்ட கோடீஸ்வரர்களாவர்.

பிர்லா குழும அதிபர் குமார் மங்களம் பிர்லா(124),கோஜ்ரெஜ் தலைவர் ஆதி கோத்ரெஜ்(183),சாங்வி குழும அதிபர் திலீப் சாங்வி (205),ஜிண்டால் குழுமத்தின் சாவித்ரி ஜிண்டால்(234) மற்றும் மல்வீந்தர் சிங் (246),பலோன்ஜி மிஸ்திரி(261),ஜிஎம் ராவ்(318),மிக்கி ஜக்தானி(334)ஆகியோர் பட்டியலில் இடம்பெற்ற பிற இந்திய கோடீஸ்வரர்களாவர்.

கெளதம் அதானி,இந்து ஜெயின்,ஷிவ் நாடார்,சைரஸ் பூனாவாலா,அனில் அகர்வால்,உதய் கோடக்,கலாநிதி மாறன்,சந்துரு ரஹேஜா,சுபாஷ் சந்திரா,அனுராக் தீட்சித் ஆகியோரும் பட்டியலில் இடம்பெற்றுள்ளனர்.

மொத்தம் 738-பேர் இப்பட்டியலில் இடம்பெற்றுள்ளனர்.இவர்களில் மிக அதிக எண்ணிக்கையிலான கோடீஸ்வரர்கள் அமெரிக்காவைச் சேர்ந்தவர்களாவர்.முதலிரண்டு இடங்களில் பில்கேட்ஸ் மற்றும் வாரென் பஃபெட் ஆகியோர் உள்ளனர்.